"a"相關的台語漢字(阿、仔、矣、啊、也、猶) @ 潘科元台語文理想國 :: 隨意窩 Xuite日誌
  • 頭戴台灣天
    跤踏台灣地
    喙講台灣話
    手寫台語文

  • 關鍵字
    1. 沒有新回應!





  • Powered by Xuite
    200905261624"a"相關的台語漢字(阿、仔、矣、啊、也、猶)

    話頭:這篇文主要的對象是阮系裡大一「台語文習作」課的學生,怹是初學者,驚了怹會學甲花去,所以要求怹攏愛寫教育部的台灣閩南語推薦用字。所擺這篇所用的漢字,若是推薦用字400字在內的,就攏照伊建議的寫法,除了第三人稱複數彼个 in,電腦拍袂出來,改用「怹」以外。但是,這个網誌其他的台語文,並無完全按照推薦用字,這點請注意。

    2009-05-26 第一版:

    "A"這个音,是全人類無分種族,上蓋自然的人聲。優美古老的Ho̍h-ló台語,就充份利用著這个上好呼的聲音,加上聲調懸kē長短的變化,產生出濟濟的話語。其中,有實詞也有虛詞。

    先簡單講一下仔實詞的例。「雞鴨(ke-ah)」、「烏鴉(oo-a)」,鴨(ah)佮鴉(a)是兩種無仝款的鳥類,烏鴉喙(oo-a-tshuì),若烏白唸,講做烏鴨喙(oo-ah-tshuì) ,彼正實是笑破人的喙。壓霸(ah-pà」的「壓」佮鴨仔的「鴨」嘛無仝。

    閣來講虛詞的部份,這是本文的重點。

    一、人名詞頭「阿(a-)」,第一聲,實際愛變調變做中調a22。親像「阿君、阿華、阿玉、阿扁、阿珍、阿義」。

    二、人名詞尾「--仔(--á)」,愛唸隨前變調輕聲,這是接佇人名後壁的語氣詞,通常是對家己人、熟似人塊叫的。親像「君--仔(Kun--á)、阿君--仔(A-kun--á)、玉--仔(Gio̍k--á)、阿玉--仔(A-gio̍k--á)、吉--仔(Kiat--á)、阿吉--仔(A-kiat--á)」。這項,目前教育部並無公告漢字按怎寫。

    三、小稱詞尾「仔(-á)」,唸本調第二聲a31,表示一類物件內底較細項、較細隻、較無重要的,親像「狗仔(káu-á)、豬仔(ti-á)、囡仔(gín-á)、廟仔(biō-á)、歌仔(kua-á)」。或者是看輕人的時所加的詞尾,親像「客人仔(Kheh-lâng-á)、查某人仔(tsa-bóo-lâng-á)、台灣仔(Tâi-uân-á)、大陸仔(Tāi-lio̍k-á)、做戲仔(tsò-hì-á)、愛吼仔(ài-háu-á)」。或者是蓋親密塊叫人所用的詞尾,親像「阿君仔(A-kun-á)、阿玉仔(A-gio̍k-á)、阿吉仔(A-kiat-á)」,

    請斟酌比較第二佮第三種的差別,彼漢字分袂出來(有人將第二種的寫做「也」--字),但是台羅會使勉強用一般的單連字號佮輕聲的雙連字號來分。我個人塊寫頂面第二種的時,規氣攏直接寫台羅。

    這个「仔」閣有用來表示較少的數量、較輕的程度、較短的時間,親像:拍兩下仔球、看一下仔冊、睏一時仔(「仔」本調)、睏一時仔久(「仔」變調做a33)。以上是照一般的變調規則去變。另外,嘛定定會變輕聲,親像「先睏一下仔。Sing khùn--tsi̍t-ē-á」「仔」變輕聲a11。閣像講:「球凊彩仔拍兩下仔。Kiû tshìn-tshái-á phah--nn̄g-ē-á.」,其中第一个「仔」是一般變調變做a33,第二个「仔」是輕聲變調變做a11。

    閣有,兩字重疊[tîng-tha̍h]的副詞,往往加一个「仔」塊用。像「寬寬仔(khuann-khuann-á)是、ta̍uh-ta̍uh仔行」。

    四、infix(中綴)「仔(-á-)」,實際唸變調懸調a33。這有的是佮頂段第三種仝來源的小稱詞,親像「狗仔囝(káu-á-kiánn)、鳥仔岫(tsiáu-á-siū)、歌仔戲(kua-á-hì)、枝仔冰」,有的是uì其他的詞素走音的結果,親像「爸仔囝 (pē-á-kiánn)」是「爸佮囝」的變音,「明仔載(bîn-á-tsài)」是bîn-tuànn(旦)-tsài的走音。為著簡化方便起見,漢字嘛寫做「仔」。

    閣有其他變做a33个詞,親像「驚了(liáu)怹會花--去」,變做「驚á(a33)怹會花--去」;「無要緊(bô iàu-kín)」變做「無á(a33)緊」。像這,寫音標較合式。

    五、句尾完成助詞「矣(--ah)」,愛唸隨前變調輕聲。親像「生矣。Senn--ah.」、「來矣。Lâi--ah.」、「水滇矣。Tsuí tīnn--ah.」、「去矣。Khì--ah.」、「走矣。Tsáu--ah.」、「你洗好未?好矣。Lí sé hó--buē? Hó--ah.」「三兩下手,就解決矣。Sann-nn̄g-ē-tshiú, tio̍h kái-kuat--ah.)」「阮某有矣。Guán bóo ū--ah」

    六、句尾補足語氣詞「啊(ā)」,攏念中調。「咱來去耍?好啊。Lán lâi khì sńg? Hó ā.」「你有錢無?有啊。Lí ū tsînn--bô? Ū ā.」

    七、感嘆詞「啊(à/ah)」,看口氣,有時唸kē調,有時唸特別的中降調a21,兩種攏愛拖較長音來講。唸kē調的例:「阿狗啊,緊來啦。A-káu à, kín lâi lah.」,請比較「阿狗--仔敢有來?A-káu--á kám ū lâi?」。唸中降調的例:「做人愛認份啊。」「啊!這就是人生啦!」

    請進一步比較第二、第三佮第七種佇人名後壁的差別:第二種是:阿君--仔(A-kun--á)敢有來?第三種是:阿君仔(A-kun-á)你有想我--無?第七種是:阿君啊(A-kun à),我咧講,你有咧聽--無?

    八、句中連接詞「抑(á/ah/iah/a̍h/ia̍h)是」,「或者是」的意思。「你是人,抑是鬼?」「Uì遮去抑是uì遐去攏會使。」

    九、副詞「也(iā/ā)」,實際塊講,變調變kē調。「你是人,我也是人。」「海水會焦,石頭會爛,我對你的愛也是袂改變。」

    十、時間狀態的副詞「猶(iáu/iá/á)」,表示「仍然」的意思,實際變調變懸調。「橐袋仔猶偆五箍。」「失敗十擺,伊猶是毋放棄。」「三十年無連絡,我猶閣(iá-koh)無共你放袂記」。請比較「三十年無連絡,我猶原(iû-guân)無共你放袂記」。

    十一、句頭/句中助詞「ah/iah」,表示意思的轉折,實際變調變做降調a31或者是懸調a33。目前教育部無推薦寫佗一字漢字,暫時寫台羅就好。「阮欲去看電影,ah你咧?」「 Ah都功課無寫了,毋敢綴(tuè)恁去看電影。」

    十二、句頭助詞「ā」,親像文言「豈」、華語「哪裡…」的意思,實際變調變低調。這字佮第十一種仝款情形,先寫台羅就好。「豈有此理」,就是「Ā有這號道理。」「人來就好,ā著遐工夫,閣紮(tsah)伴手來。」

    以上,若是會曉講台語的人,攏真自然著會曉分,但是一旦欲寫,若無一个全面觀照,分析歸納的能力,就會寫甲li-li-lak-lak。請各位用心比較研究,好好仔體會台語的精妙。Lóo-la̍t.


    IE8|日誌首頁|古文翻譯練習--祭十二郎文、祭...上一篇IE8下一篇古文翻譯練習--祭十二郎文、祭妹文摘錄...
    回應