201806181254107 年全國語文競賽-閩南語朗讀文章(國小組)

107 年全國語文競賽-閩南語朗讀文章(國小組)

 

01 公園  游勝榮        

 

這站仔,阮兜附近的榮星公園實在是有夠鬧熱的啦!因為舊矸仔貯新酒、舊店仔賣新貨!市政府佇舊年尾,共耍甲強強欲臭殕去的兒童遊樂區,攏重整理過,真緊就隨閣開放予逐家𨑨迌矣!

新的設施,毋但有規大片的塑膠地毯、一大窟的幼沙仔,閣有增加誠濟好耍的物件,親像講上蓋新型的趨流籠、空中行吊索、吊雙環啦……,有幾若項,攏是囡仔人上佮意耍的。

這層予人歡喜的代誌,電視新聞嘛有報過幾若擺。來遮耍過的人閣常在佇網路頂懸食好鬥相報,所以講,無論是遠路抑近路、大漢抑細漢,誠濟人攏會曉欲𤆬囡仔來遮𨑨迌,逐个攏嘛耍甲歡頭喜面笑咍咍。

若是拄著歇睏日仔,彼誠實會驚倒人,會使講是人山人海、洘秫秫,有當時仔連欲徛都強欲揣無位。有一半个仔閣較古錐,規氣共『thiàn-tooh』順紲紮來,中晝閣叫人共便當送到位。就按呢,大細漢囡仔食晝、睏晝攏佇遮做一擺解決,真正是一兼二顧,實在是有夠心適的啦!毋但大人滿意,囡仔閣較免講,來遮耍一擺就牢咧,定定嘛看囡仔走咧予大人逐。大人喝規晡,囡仔都欲若毋咧,叫攏叫袂振動。若無就是佇遐張、佇遐躽,佇遐吼毋轉去。這嘛莫怪,定定攏予人關佇厝裡,若𤆬出來耍,當然嘛像鳥仔放出籠,四界硞硞傱。

會記得做囡仔的時陣,和厝邊隔壁的囡仔伴耍的,若毋是拍干樂、擉珠仔、搧尪仔標,就是灌杜猴、欱蝶仔、釣四跤仔,有的無的,耍法是加偌趣味咧,哪有像這馬的都市囡仔,會當耍的極加嘛是遮的遊樂設施爾,看著一點仔趣味都無。是講囡仔有通耍就好,一時風駛一時船,時代咧變、囡仔的耍法咧變,咱的想法嘛愛綴咧變,若無是會予人笑咱是老古板呢!

毋管時代按怎變,囡仔仝款攏是爸母的糖霜丸,看市政府重整理榮星公園予囡仔耍、看大人閣願意陪囡仔出來耍,看甲我這个退休的阿伯仔嘛綴咧變少年,綴咧「老人食麻油」──鬧熱啦!

 

 

02 抾拾  陳忠本

 

我讀國校仔的時陣,逐家生活散赤,儉腸凹肚,才會當予囝兒讀冊,所以逐項物件攏愛虯儉、惜略。無錢買冊包仔,用加薦仔貯,抑是手巾仔包。上捷用著的文具──鉛筆佮拭仔,攏是用到盡磅矣才換新的。鉛筆短甲無法度通扲,猶毋甘擲掉,鬥一節竹管仔繼續使用;拭仔鑢甲賰鼻屎大;大筆毛落甲欲了猶咧寫。逐家攏是按呢,抾拾成做全民的習慣。大地主、好額人的囝孫嘛仝款。所以後來我去學校教冊,看上袂慣勢的毋是學生貧惰讀冊,抑是狡怪毋聽話,是傷過討債,物件毋知通惜略。

寢去學校教冊,感覺奇怪的是講桌頂懸一直有幾若枝原子筆,而且愈來愈濟,鎮甲強欲無位通囥粉筆。這攏是佇教室內底抾著的,哪會無人來提轉去咧﹖想著家己國校的時拍毋見一枝鉛筆,就哭規禮拜。這馬的學生竟然物件無去就準煞,無欲去揣,嘛無想欲共老師報告,感覺誠奇怪。有一工,我發現一枝筆有貼紙寫名,就刁工問這位學生:你的筆敢有拍無去﹖」伊鉛筆盒仔開開,捎規搣出來,應講:我嘛毋知﹗」想想咧嘛有影,遮濟筆,減一枝哪會知﹖

有一擺𤆬學生出外去考試,旅館提供早頓,逐个人攏有一粒鹹鴨卵。結果,百外个學生干焦有五个共卵殼擘開,提來配糜,其他的攏是規粒好好,佮食賰的物件濫濫做伙,欲予服務人員倒落潘桶。有夠拍損﹗阮趕緊佮教官去共窮起來,一个人分二三十粒提轉去。

校慶運動會,中晝福利社送全校學生、老師一盒便當。老師攏感覺豐沛好食,食甲清氣溜溜。學生咧﹖過晝了後,一位老師來講佇牆圍仔跤抾著十外盒便當,攏是食無幾喙,甚至規盒好好就擲掉。討債﹗」我心內按呢想。

俗語講:勤儉較有底,浪費不成家」、加減抾,較免共人借」。運動會煞,我共便當擲掉的學生查出來,利用時間特別教示,閣放一寡非洲飢荒餓死人的影片予因為我堅持:冊讀有讀無免煩惱,勤儉抾拾的習慣袂使無。

 

 

03 愛綴路的  王秀容

 

「啥人欲綴喔?」阿公準備欲出門囉。伊刁工喝欲予我聽的,因為兄姊攏大漢無欲綴矣,毋過我閣足愛綴呢!定定佇門口耍甲一半,影著阿公欲出去,就隨喝講:「我欲佮阮阿公來去矣,後擺才耍。」囡仔伴攏嘛隨應講:「愛綴路的。」

有通食、有通耍,我毋才會想欲綴。佇「生食都無夠,哪有通曝乾」的囡仔時代,若會當啖著四秀仔,袂輸猴山仔食著弓蕉咧,樂暢的感覺,到今想著猶閣會偷笑。

是食啥物好料的咧?上豐沛的就是去食一碗五箍銀的摵仔麵。彼塊囥佇中央的肉杮仔,攏留甲規碗囫了,才用湯匙仔共撈入去喙裡含咧,毋甘隨哺哺吞吞落去。阿公撏錢咧納數的時,我綴佇伊尻川後,全心全意咧欶[suh]彼塊肉的汁,足甜的呢!莫怪到這馬,去到佗都愛食摵仔麵,連去飯店食包肥的『buffet』,嘛會先來一碗。人攏笑我無彩錢,黜我講「哪閣有法度通食別項咧?」毋捌啦!摵仔麵食落去,心情好,脾土開,顛倒食較濟!

我嘛誠愛綴阿公去漢藥店。定定有人來厝裡揣阿公討藥單,隔轉工伊就會去敆藥仔。遐會當看著足特別的物件,像龜啦、鱉啦、海馬啦,閣藥頭仔逐款攏有名,我坐佇邊仔一下仔看動物,一下仔看植物,一下仔認藥格仔頂的字,袂輸咧踅博物館咧,足趣味的。頭家驚我等久會囉,逐擺阮尻川才頓好,伊隨挲兩包宋陳予我窒喙空。酸微仔酸微,我會共含佇喙裡閣用舌共輾來輾去,袂輸擉煙腸的珠仔台,足好耍呢!若講傷久,頭家閣會補我兩包,我攏儉轉去分兄姊食。

我上愛綴阿公坐市區的去辦代誌,因為車牌仔遐拄好有一間𥴊仔店,阿公會買一包牛奶糖仔予我。我共當做寶貝仝款袋佇橐袋仔,閣定定去摸看有落去無。一包十二粒,坐去閣坐轉來,我攏算好好,食甲賰六粒,轉去拄好兄姊一人食兩粒。

逐擺,我提出來分食,免品,嘛足奢颺。食甲足歡喜,毋過會笑笑窮分講,古早綴有著,煞無通食,講我這个愛綴路的有影較好命!

 

 

04 炕塗窯  簡惠珠

 

細漢的時代無手機仔,無電腦,連欲看電視都愛去厝邊的客廳才有通看。阮無科技的𨑨迌物仔,上捷耍的就是和囡仔伴走相逐、覕相揣,閣來就是佇厝頭前的田裡變猴弄。

後頭厝的徛家頭前是一片闊莽莽的田地,田裡若有種稻仔的時,田岸仔路就是我下課了後會去耍的好所在。一枝竹仔縛一條釣線就是一枝魚釣仔,欲釣的毋是魚仔是田蛤仔,手攑釣竿仔擢懸擢低唌田蛤仔來食餌,有時閣釣甲有通仔予阿母加菜。一碗清清的蒜頭四跤仔湯就是阮的山珍海味,而且閣加上家己的成就感,湯頭啉起來感覺特別甘甜。毋過若是影著釣起來是一尾長長的水蛇,我就釣竿擲咧趕緊『落跑』。

稻仔收成了後是我上快樂的時陣,我和囡仔伴會佇田裡享受大自然,掠草猴、弄草蜢仔,猶有就是我上愛的炕塗窯。

佇咧稻仔割了,猶未佈後一擺的稻仔進前,作穡的阿伯攏用犁共田裡的塗僥僥反反咧,僥過了後,田裡的塗丸仔就是我炕塗窯上讚的材料,因為起塗窯我上內行,所以賰的囡仔伴攏干焦負責抾塗丸仔。我攏先用三塊紅磚仔排一个『ㄇ』字型成做欲囊柴的窯門,紲落來用較大粒的塗丸仔圍踮磚仔邊先箍一个圓,閣來就是一層一層,愈圍愈懸,上重要的鋩角就是圓箍仔愛愈圍愈細个,一直到共塗窯的厝頂崁起來。

起好了後阮就開始燃柴,等塗窯的塗墼燒甲紅記記的時,這陣就是欲囥番薯的好時機矣!閣來就是對塗窯懸頂的塗墼用火鋏共挓一寡落去,予頂懸成做一个空,利用這個空共番薯囥落去塗窯內底,才閣用棍仔撼予倒,閣共塗砂粉仔崁踮頂懸,才袂予燒的空氣走出來,按呢番薯才會熟、才會好食,紲來就是等待的時間矣。

等待的時阮會擉玻璃珠仔、擗樹奶,聽候時間若到,全部的囡仔伴圍佇塗窯邊,用柴枝勻勻仔共塗丸仔挖開,共一條一條芳kòng-kòng的番薯,勻勻仔挓出來分予在場的每一个人,逐家就歡頭喜面,佇黃昏的日頭跤享受這簡單的幸福。

 

 

05 愛會記得𤆬我轉來喔  鍾育紋

 

有一个下晝,阮大伯來招我去看兜的豬仔囝,我講豬牢臭臭,無愛去。伊煞一直共我唌,講豬牢今仔清過,袂臭啦!拄出世的豬仔囝偌古錐拄偌古錐咧,閣講我會使佇邊仔看欶奶,提hòo-sù管共灇身軀,嘛會當予我抱起來摸的毛,猶閣會使看豬仔囝軁過豬牢邊仔的細个空,走去後埕彼搭𨑨……。聽伊講甲喙角全波,我彼當陣干焦讀國校仔一二年仔,一漢仔疕哪會堪得予人按呢唌?不而過,補習班的車連鞭就欲來載我去上課矣!雖然毋情願嘛是愛另工才去。

隔兩工,有一个房頭仔內的阿伯來阮兜食茶,講伊小等咧欲去阮大伯遐,彼工的宿題拄好寫好矣,阿爸佮阿母答應予我綴伊去。我就佮彼个阿伯講好勢,叫伊著愛會記得共我載轉來才會使喔!我歡喜甲喙笑目笑,啊!豬仔囝,我來矣!

叔伯阿兄看我去到兜,就隨共我牽咧,親像導遊仝款,𤆬我去踅兜的豬牢。彼幾隻仔豬仔囝就若像大伯講的,古錐甲予我佇豬牢看規點鐘久都袂𤺪。尾仔轉去大伯廳裡的時,大人做咧開講,我佇邊仔煞一直咧哈唏。大人講:「囡仔人下晝無睏擋袂牢啦!小睏一下無要緊。」我真正傷過愛睏,嘛想講阿伯若欲轉去,就會共我叫精神,無一睏仔,我就睏甲毋知人矣。啥人知影我一下醒,阿伯煞先轉去矣。我氣甲那吼那罵:「講話無準算!凊彩騙囡仔!」

大姆共我安慰講:「無啦!阿伯有先敲電話予恁老爸啦!叫伊送貨的時陣才斡過來載你轉去。」毋過我起毛猶是真䆀,共伊當做是白賊七仔,就按呢,決定以後無愛閣佮伊講話矣!

無幾日仔,阿伯又閣來阮兜食茶,聽逐个講彼工我哭甲真忝,就好禮仔共我會失禮。只不過彼陣我猶細漢,腹腸無遐爾闊,毋管阮序大人按怎苦勸,自彼站開始,我就無愛閣佮伊相借問矣!一直到我讀國中蹛學寮的時,規禮拜才有法度轉去厝裡一擺,閬足久才閣看著伊,我毋才開始閣再叫伊一聲「阿伯」!

 

06 頭一擺的音樂會  王雪瑜

 

今仔日是我頭一擺佇中興堂的大舞臺頂表演,這是我一年來的向望。為著欲上臺,我穿一軀白色的短衫短褲,面頂有藍色佮紅色的花草,看著誠影目。透早就來排練到今,雖然是佮逐家同齊演出,毋過,看著臺跤密喌喌的人,我嘛是緊張甲雙跤咇咇掣,雙手一直流手液,按怎拭就拭袂焦。老師一直交代阮表演的時陣愛有笑容,毋過,逐家攏緊張甲笑袂出來。布幕一下搝懸,指揮老師的手一下比,我就綴節奏開始輕輕敲木琴。拄開始節奏慢慢仔,敢若鴨仔咧行路。聽著後壁的大鼓愈挵愈大聲、愈挵愈緊,袂輸火車對遠遠的所在欲衝過來,我手中的木琴槌仔嘛綴咧愈敲愈緊,一時仔敲正爿、一時仔敲倒爿。身軀綴音樂搖來搖去,煞尾鼓聲一下停,指揮老師的手隨攑懸,表演結束。噗仔聲響起,我規个人隨快活起來,這時陣我歡喜甲笑出來。想著會當佮表姊仝款上臺表演實在誠無簡單。

舊年拄歇熱的時陣,表姐足歡喜共我講伊八月佮音樂教室欲佇中興堂表演,問阮規家伙仔欲去聽伊的音樂會無?阿母聽了隨應好。猶會記得音樂會彼工,表姐穿一領柑仔色的Ha-uá-ih草裙,頷頸掛一捾花箍,手提一臺飛行機,綴指揮老師行入舞臺,表演的歌曲是「來去Ha-uá-ih」。臺頂的伊面帶笑容,身軀綴音樂的節奏搖來搖去。沙鈴、鈴鼓佮邦哥鼓快速的節奏,敢若熱情的舞步,一直徙位,一直扭尻川花。紲落來木琴的聲音加入來,敢若粟鳥仔咧啄米,遮一下、遐一下。雖然節奏無拄才遐緊,毋過,予人有一種聽著心花開的感覺。就是這種感覺,予我決定欲綴表姐的跤步,來去學木琴,想欲佮伊仝款徛佇舞臺頂表演予逐家看。

為著今仔日的表演,我連紲兩個月,逐工都練習兩點鐘。落尾這四擺上課攏愛排練,予我心情一直足緊張的。落臺了後,老師問阮明年欲閣來開音樂會無?愛風神的我,真有氣魄共老師頕頭。

 

 

07 快樂的兒童節  吳秀卿

 

今仔日是學校一年一擺的兒童節慶祝活動。踏入校門就看著司令台布置甲媠噹噹,五花十色的雞胿仔,敢若一座美麗的城堡。運動埕頂頭一排一排的風吹輪綴風一直轉、一直踅,若咧跳舞、若咧唱歌歡迎阮遮的小公主、小王子。

八點鐘仔聲霆,校長就敲鑼宣佈活動開始。一大陣的學生囡仔親像放出籠的鳥仔,衝對運動埕去。頭前排是灌風的跙流籠、電動機車站、雪文波王國、投籃勇士隊、野球九宮格,有夠鬧熱!閣較內底猶有電影院、小丑仔樂園。哇!學校變做一个遊樂園呢!雄雄看著美國隊長、蜘蛛人佇入口迎接阮,原來逐關的關主攏是老師妝的。

我先去騎電動oo-tóo-bái,體驗騎車的威風,才閣去小丑仔樂園。小丑仔阿叔有夠古錐,伊做足濟好耍的動作共逐家弄甲笑咍咍,閣予阮捏伊的紅鼻仔,捏一下就吱一聲、捏兩下就吱兩聲,害阮笑甲攬腹肚。紲落來,閣去上蓋受歡迎的電動投籃球機台,排隊的人躼躼長。誠無簡單輪著我,我就功夫盡展,連紲投三粒入去,趁三塊糖仔。

用野球掔九宮格閣較愛靠技術,我球提咧相準準大力掔出去,輕輕鬆鬆就共九个格仔攏掔倒,現場噗仔聲霆袂煞,予我足有成就感的!上尾,走去看電影佮雪文泡王國耍,會使講逐項攏耍透透,耍甲足歡喜的,我感覺阮正港是今仔日上奢颺的主角。

十一點一下到,逐家攏準時集合,因為上刺激的節目就欲起鼓矣彼就是班級灌風的跙流籠比賽聽著觱仔聲,規班衝對跙流籠遐去。逐家團隊合作,下面的人共頂面的人鬥捒,一个接一个拚命起去頂懸。等規班攏到位才同齊跙落來,雖然逐家攏甲大粒汗細粒汗,毋過,笑容是遐爾甜、遐爾仔滿足。這場比賽嘛是今仔日上精彩的『Ending』。

這擺的兒童節活動,袂輸一場刺激的冒險,嘛親像眠夢仝款。感謝所有的老師佮志工,替阮設計遮爾心適的活動,予阮會當歡歡喜喜過一个快樂的兒童節。

 

 

08 青紅燈  黃惠玉

 

伊無厚話,恬恬仔做,無計較,無怨慼。這馬當咧吵甲欲反過的「一例一休」佮伊攏無關係。一年三百六十五工規年迵天攏無歇睏,無閬工。一日二四點鐘無暝無日,無閬時。無論是赤焱焱的日頭跤,抑是澹漉漉的落雨天,伊攏佇遐。這是伊的工課佮責任,因為伊是----青紅燈,逐工顧佇十字路口,指揮交通。

有智慧、疼惜性命的人,駛車、騎車、行路經過十字路口,隨時注意伊面色的變化,照伊的指揮來行;討厭伊的人,看著伊的面變色,真袂佮意。目睭一瞭,看著伊連鞭欲變色:青的爍過,換爍黃的,隨就欲變紅的,叫伊愛注意矣,毋通閣衝,毋過伊煞毋但無踏擋仔,油門閣催落去,趕緊欲衝過。哎喲喂!這擺好佳哉無代誌,後擺就歹講。伊的衝碰予人看著真驚惶,心臟噗噗惝!按呢青磅白磅,烏白傱、烏白挵。有當時無細膩,緊早慢嘛會出代誌。

佇青紅燈的面頭前,無分車的好䆀,毋管是新點點、金爍爍的烏頭仔車抑是老閣舊的發財仔;無論是大頭家抑是手面趁食的艱苦人,嘛無分大細,毋管你是老歲仔抑是囡仔人,逐家攏平重。青燈行,紅燈擋,規則真簡單逐家攏會曉,干焦看你欲遵守抑是毋遵守爾爾。若是愛惜性命,咱就斟酌看。若是毋看,青紅燈嘛無奈何。

危險的十字路口,青紅燈閘頭前,替咱顧路面。雖然無出聲嘛會當共咱指示當時好行、當時愛停。有伊的時陣,咱過車路加真安心。伊親像有智慧有愛心的序大,逐工無暝無日佇十字路口共咱顧、共咱指示。

做工課照起工,袂張、袂厭𤺪,免領薪水、免排假的青紅燈,感謝你的照顧,予阮佇危險的十字路口會當大伐行,穩心仔騎,安心仔駛。

十字路口的青紅燈,予咱駛車行路加真放心。性命中,真向望嘛有咱的青紅燈,佇人生的每一个坎站共咱指示,當時好衝,當時愛踏擋仔,莫予咱衝過頭毋知擋。若無,等到事業、身體、家庭出問題,才知害,按呢就袂赴矣!

沒有上一則|日誌首頁|沒有下一則
回應
關鍵字
    沒有新回應!
我的最愛
衛星雲圖
衛星雲圖
Colors of the Wind
楊秀卿唸歌—七字仔大歌廳上網
萬年曆

諺語

孽詰仔話

下面三个是允言兄的物件, 會隨機變換, 逐遍點逐遍無仝:
1. 台語華語辭典
2. 戀戀台語文 (內容有:選讀/俗語/笑話/書影;請繼續點連結)
3. 台語文句欣賞

單曲英語老歌連結:
1. El condor pasa
2. Bridge Over Troubled Water

知識+的台語問題
Yuh-ru Dyertung Tung

我的訂閱
台灣四界抛抛走(入去了後點每一篇文章標題頭前的編號所在就會使看欲看的所在)
送人客轉去恁兜

夢生的電子冊
好朋友
網站連結
教羅的網站

1. 台語信望愛(資料足濟)[嘛會使轉做台羅字]
(A) 《台灣元氣寶典》(用俗語講台灣歷史)
(B) 浪子回頭(布袋戲)
(C) 歌仔戲--桃花過渡(新音樂版)(ppt檔,若欲直接聽戲, 按山明水清開始)
(D) 特別專輯(有情人節等節日專輯)
(E) 《台灣元氣寶典》(用俗語講台灣歷史)
(F) 台語Unicode轉碼工具(拍數字轉成台羅聲調)

2. 白話字台語文網站(資料世界濟)

3. 台灣俗語鹹酸甜(有搜揣的功能, 逐條有解說)

4. 台語笑詼代(有204編的笑話)

5. 台語羅馬字教材(有袂少的基礎教材, 嘛有排斥無仝系統有淡薄仔偏激的文章)

6. 台語線頂字典(查漢字的發音佮仝音字)

7. 台語文語詞檢索(查語詞佇一句話出現的位置, 會當用查著的資料做語意和語法的分析)

8. 台日大辭典試讀版(將近90000條的詞條, 閣有原冊的圖形檔通看)

9. 台文華文線頂辭典(舊版, 熟手會使直接點新版來用)佮 統計

10. 全羅漢羅轉換工具(照範例去做就會曉用矣)

11. 台語百科全書(全羅的維基)

13. 台語詞頻資料(直接點[頻率統計]等看結果)

14. 信望愛台語客語輸入法

15. 台語文計算語言學(愛點論文入去看)

16. 華台轉換系統(使共華語翻做台語)

19. 台語線頂聖經(會使自由選項來合咱看的口味)

20. 線頂讀台文
(A) 阿瑛a(張聰敏前輩台語長篇小說, 請點數字按順序看)
(B) 威尼斯的生理人(莎士比亞原作劇本, 陳清忠校長翻譯)
(C) 細漢 ê 時陣(尤榮坤口述 兩齒的整理;散文作品集22篇)
(D) 十項管見(老前輩蔡培火, 台灣文學史的第一本台語散文)[全羅馬字](愛閣點細目才看會著文章)

21. 母語家庭

22. 研討會論文

(2010.04.25更新)





Powered by Xuite