201710191300【悠閒寫意】澳門鷺環海天度假酒店

平時生活實在係太忙喇!相信好多媽媽都好似我哋咁,每日就係番工、放工、湊小朋友,直至好夜先有私人時間做下自己嘢同休息。好攰,好想放假呀!無形嘅生活壓力影響之下,有一晚發咗個好奇怪嘅夢。夢境應該係在旅途中,因為見到嘅係由酒店房行出露台望到一片沙灘,感覺好輕鬆自在!之後上網無意中發現鷺環海天度假酒店有沙灘景觀房間,緣份驅使之下,註定我哋要過澳門一趟呀!


酒店位於遠離鬧巿嘅路環區,背山面海,環境十分優美~


正門對住嘅就係出名嘅黑沙灣海灘喇!


此情此景,咩嘢煩惱都拋諸腦後啦!身心舒暢~


馬上向酒店進發,為大家揭開佢哋神秘嘅面紗~


經過噴水池一直往前走,離遠少少落地玻璃果度就係酒店正門喇!


酒店比較偏遠,來往巿區都要靠shuttle bus。每半小時一班,以循環線來回外港碼頭~

路線:酒店 -> 威尼斯人 -> 茵景園(對面) -> 外港碼頭 -> 茵景園 -> 新濠天地 -> 酒店 

入住後想去邊度玩都最好預先book定shuttle,咁就可以更好預算啦!


進入酒店後,首先會經過一個大魚池,晴朗都對水中嘅魚同龜好有興趣。就等佢哋慢慢觀賞,我去搞check-in先喇!


酒店裝橫優雅,帶有一點古典味道。職員服務殷勤有禮,整體感覺都唔錯!不過如果撞正下午3點鐘check-in peak hour,辦手續時間可能會等好耐。最好就早啲嚟啦!


攞咗匙咭可以上房lu~ Yeah!!! 興奮嘅心情冇一刻停止過~


右手邊嘅係酒店餐廳,佈置簡潔舒適~


房間包咗早餐自助餐,聽朝一定要落嚟拆餐勁嘅!XD


我哋間房響6樓,609號房。忽然同晴朗玩起遊戲來,鬥快搵到房間就有獎~


晴朗跑呀跑!好快就搵到間房所在位置。但唔好忘記匙咭響我度,點都要等埋我先啦!^^


一入到房,右邊係衣櫃,左邊係洗手間,離遠已經見到落地玻璃,同夢境中嘅畫面好相似呀!*o*


行入啲會見到兩張雙人床、電視櫃、書枱同梳化椅~


間房都幾大,空間感充足。今晚就響度住一晚,今次唔係發夢呀!*o*


晴晴攤咗響梳化椅度,幾識嘆?不如出埋去露台睇啦!


嘩!原來係無敵大露台,想睇風景除咗企響度睇之外,仲可以坐低慢慢嘆添!夜晚嚟觀星應該一流呀!


望出去係一望無際嘅海景,見到泳池,亦有少少海灘景。雖然同夢中嘅大沙灘景有啲出入,但呢個海景唔係仲正咩?^o^


左右環顧可以望到其他房嘅露台,咁咪越住得高層越著數?你望到人,人哋望唔到你丫嘛!XD


泳池加上無邊際嘅大海,景色怡人,實在令人心曠神怡,太美好喇!


美中不足嘅係天氣太熱,都係入番房裡面嘆冷氣囉!^^'''


洗手間都夠大,晴朗爸爸已經捷足先登入去體驗咗個廁所喇!XD


有浴缸~


又有企缸,鍾意浸浴或淋浴都得啦!


雲石枱下嘅櫃筒藏有風筒,而枱面上已提供晒基本生活所需~


好似牙膏、牙刷、沖涼帽、肥皂等一應俱全~

響呢個時候,晴朗嚷著要到泳池玩。好啦!換好泳衣,我哋就馬上跳落水濕下身囉!想睇埋我哋嘅玩水情況,可按以下連結~

【黃昏嬉水】泳池及按摩浴池@澳門鷺環海天度假酒店:
http://blog.xuite.net/chinglongtin/blog/539744370

游完水有啲餓,我哋搭咗shuttle出去宮也街行街、食飯同買手信。期間發生咗一啲趣事,到總結今次澳門之行嘅時候再同大家分享啦!好搞笑又開心!過咗愉快嘅一個晚上。第二朝一早,趁晴朗佢哋未起身就一個人落咗去酒店附近行下、影下相~


一個人悠悠閒,可以慢慢影、慢慢感受~


行到落沙灘回望酒店,好靚!就好似去咗鳥無人煙嘅荒島咁,海浪聲不停拍打岸邊,加上柔和嘅海風吹來,好舒服呀!


黑沙灣果然名不虚傳,越行啲沙就越黑。響呢個moment,真係想咩都唔做,就係咁呆上大半天~

結果呆咗15分鐘,係時候要返回現實喇!@@


番到酒店房已經見晴晴起咗身,仲睇梗風景添!冇錯呀!呢度風景如畫,唔只大人識得欣賞,就連小朋友都盡情呼吸新鮮空氣~


在欣賞風景期間,晴晴發現泳池旁邊有個遊樂場,仲想即刻落去玩~


早餐都未食就急住去玩,又一次將爛玩本色發揮得淋漓盡致~ XD


摛高摛低、瀡滑梯、呢度摸下、果度裝下,盡情去玩啦!成個遊樂場就係晴朗玩晒囉!


等待小朋友玩樂期間,發現酒店內外都被戌密嘅樹木包圍住,就好似置身於森林內渡假一樣~


見到歐陸式嘅露天茶座,代表我哋開餐嘅時間好快到喇!


掛響天花呢盞風扇好有古典味,就連外牆都被植物纏滿,餐廳被一鼓莫明嘅神秘感濃罩著~


天氣凍啲嘅話,戶外座位係唔錯嘅選擇~

個肚打到「古古」聲,係時候要拆大餐喇!想睇埋早餐buffet嘅情況,可按以下連結~

【舒適寫意】Cafe Panorama@澳門鷺環海天度假酒店:
http://blog.xuite.net/chinglongtin/blog/535225874

食飽過後,當然係繼續玩啦!食同玩係小朋友嘅專利嚟丫嘛!


我哋去咗酒店嘅kids club,又係放電好時機喇!


晴朗二話不說就已經到處進行大搜索,玩咩嘢先好呢?


車車?瀡滑梯?恐龍?晴晴仲同恐龍一齊騎馬仔添呀!好得意!


之前向酒店查詢過知道kids club啲玩具啱細啲嘅小朋友玩,冇抱期望之下,估唔到晴朗一樣樂在其中,小朋友嘅快樂就係咁簡單~


玩完嘅玩具要放番好,咁先至係好孩子!

差唔多時間,執埋行李就要去check-out lu~


晴晴把握最後機會同魚魚、龜龜們講bye bye~


佢哋好似識聽咁,游得特別生猛呀!下次再見啦!


酒店嘅每個角落都係咁悠閒舒適,有機會都想再嚟住過呀!

理想可達到,夢境都可以變成真!上幾次都係住氹仔果邊啲酒店,今次嚟到鷺環海天度假酒店感覺好唔同。酒店座落於澳門鄉郊嘅路環區,景色怡人,空氣都清新啲呀!不過諗諗下呢度無論環境同設計上都同N年前住過嘅香港黃金海岸酒店好相似,但呢度話晒都過咗個大海,而且附近人同車都少啲,更加唔會有賭場,咁先似係去渡假加嘛!有件事好神奇!番到香港之後,晴朗爸爸同我都好回味今次旅程,我仲講咗句「不如下次試埋威斯汀啦!都係響路環,想試好耐喇!」。經晴朗爸爸上網一check,鷺環海天度假酒店嘅前身就係威斯汀酒店嚟!好驚訝呀!原來已經一次過滿足晒所有慾望,細個夢寐以求嘅事,竟然可以發生?應該話已經發生咗。哈哈!幸福寫意嘅感覺,大概就係我哋喜歡去旅行嘅原因喇!


澳門鷺環海天度假酒店

地址:黑沙海灘黑沙馬路1918號鷺環海天度假酒店
電話:(853) 2887 1111
網址:http://www.grandcoloane.com
facebook:https://www.facebook.com/GrandColoane

         
 
旗艦部落格:
回應
讚好FB專頁
如果想第一時間接收資訊,請讚好我哋嘅FB專頁:晴朗天 - 食·玩·育·美·愛の親子平台,而且響「已讚好/Liked」選單揀選「搶先看/See First」,多謝支持我哋呀!^^

晴晴、朗朗係我嘅一對寶貝,就讓我和晴、朗一起為大家發掘更多有關飲食、玩樂、培育、美麗、愛既資訊,咁就天天都是晴朗天啦!(≧∇≦)

累積 | 今日
loading......
關鍵字