2016070822462016 Revival Summer Camp(客家話)

7/4~7/7𠊎去參加2016 Revival Summer Camp。活動个前暗晡,𠊎睡毋得,就決定來為活動祈禱,特別係天氣、和平相處等等。祈禱到差毋多朝朝三點正睡。 

第一日(7/4)當晝頭,𠊎兜教會就坐遊覽車去桃園市中壢區个中原大學參加2016 Revival Summer Camp。到該位𠊎兜就去報到摎去房間放行李,𠊎歇在男宿舍,宿舍房間裡背,眠床在頂背,書桌在下背,若愛上眠床,就愛拿放在宿舍个梯仔鉤在自家个眠床然後跋上去。放忒行李後就去會堂摎自家个區摎小組相識,這擺活動分組摎上擺寒假共樣,有紅色區、橘色區、黃色區、綠色區、藍色區摎吊菜色區,逐區會有四個小組。

相識後,𠊎兜就去尞大地界母。𠊎盡有印象个係用兩個盎仔將放在裡背个珠仔從頂項搖到下頭。該界母𠊎看過電視節目有尞過,毋過亻恩兜愛體驗過正會知愛仰般尞。原本𠊎恅著係愛遽遽搖,毋過其實係愛慢慢搖珠仔正較會落去。

暗晡七點係聚會一,該聚會請到張牧師摎𠊎兜分享「你敢有特色?」𠊎聽忒正知人个信心看仔著、做毋得做基督徒个007(祕密情報員)、上帝可能已經將恩典賜分人毋過人無在用,像手機APP自家有當多毋過自家無在用。最後,𠊎也知教會也有可能會有當多無得人惜个人。

 第二日(7/5)朝晨十點到十二點係聚會二,該聚會請到呂傳道來摎𠊎兜分享「仔个心。佢當生趣,佢少年个時節也愛尞「小朋友落樓梯」摎「小朋友上樓梯」。所以佢為著愛讀書就愛抵抗該東西帶分佢个勾挽。聽忒佢个講道後,佢在為𠊎兜祈禱个時節,𠊎一直流目汁。該講道分𠊎知「个定義係長又毋變个東西,人常常都有兩個律在對抗;耶穌个死分罪消滅,耶穌个復活分新个贏過罪。

聽忒講道後,𠊎兜就去食晝,食忒後,𠊎兜就尞當刺激个界母-----全員逃走中,該界母係尋寶摎閃獵人,參賽者愛將紙貼在背囊、全組共下行動毋係全區。獵人愛用水槍射貼在參賽者背囊个紙。參賽者个紙若分獵人噴到整張紙溚溚,就毋算分。參賽者還有公主个角色,該角色係若紙溚忒,就出局而且做毋得繼續尋寶。伸个參賽者愛尋寶摎做公主个保鏢。𠊎感覺𠊎較無在尋寶,𠊎較係在保護公主。

尞忒後,就馬上去中原夜市尞食字路口,該係食物接龍个界母,接著个東西名詞,就愛去買然後翕相傳Line分關主。

暗晡七點係聚會三,該聚會請到Garrick傳道摎𠊎兜分享「末世英雄」。佢講个東西分𠊎知一種東西,就係HollywoodBollywood有麼个無共樣?就係對英雄个定義,Hollywood定義个英雄係有超能力个人;Bollywood定義个英雄係戇牯人,因為膽大大講出自家个弱點正係英雄。佢也摎𠊎兜分享到人个曠野,上帝个呼召;人當驚个,上帝个武器;人个軟弱,上帝个聲音。

 第三日(7/6)朝晨八點半,𠊎兜食朝食忒後,就來準備暗晡个聚會五所愛表演个戲劇。𠊎係戲劇組,該時毋知𠊎做得做麼个,所以就跈等摎自家同區同教會个人共下去跳開場个軍人舞。

排忒戲後,就去聚會四,該聚會請到嚴傳道來摎𠊎兜分享「在基督裡个祕訣」。𠊎聽了後,感覺佢講著个屬靈年齡愛細義个事當生趣,屬靈年齡中,屬靈个細人仔,愛記得自家係分耶穌救个罪人;屬靈个後生仔,愛知自家因為耶穌就已經贏過惡者;屬靈个大人,做毋得頓恬認識主。

聚會後,𠊎兜就去摎自家个區共下食晝摎排戲。原本𠊎單淨跳軍舞,毋過因為舞團需要一兜人去支援,佢兜看𠊎跳舞當好,就問𠊎做毋做得去支援,𠊎想一下,就答應佢兜,決定去支援舞團。恁樣𠊎就係有兼任軍團摎舞團兩個任務,雖然當𤸁,毋過𠊎感受到該係上帝个祝福,因為𠊎原本毋知自家做得做麼个,所以上帝就分𠊎兩個任務,實在愛感謝上帝。

 最後一日(7/7)朝晨頭,𠊎兜就整理行李摎退房,然後去聚會六。該聚會當特別,有四儕傳道愛上臺接受柳牧師个訪問,分享自家个見證,像談話節目。

聚會結束後,𠊎兜自家就去拿便當摎翕相還有準備離開。

 這擺个活動愛感謝上帝有聽𠊎兜个祈禱,因為有風搓毋過上帝分𠊎兜在活動个時節無分佢來影響𠊎兜。𠊎在這擺活動也領受當多。將榮光歸在上帝,阿門。

沒有上一則|日誌首頁|沒有下一則
回應
個人臉書
關鍵字
    沒有新回應!





Powered by Xuite
個人臉書
粉絲專頁