查實 23歲長發有心有力，回復單身後已極速搵到兩個新古井，出盡力冧掂跟 Karen同類嘅失婚中女富婆，繼續過其鴨仔式生涯。
據知長發善於以失業兼失戀嘅「可憐」形象，引發中年女性母愛，最近已成功冧掂契媽 Christine Liu及舞王霍紹裘現任女友 Sindy Mok（莫秀芳），長發更得「契媽」賞賜新工，其實發仔咁有實力，唔使擔心飯碗啦，仲可以食多兩隻雞蛋補補身。
黃長發年初高調同三奶 Karen（李姿霆）開記招宣布為愛退出娛樂圈，但隨住「鞋王」出招鬧上法庭後，劇情亦 180度逆轉，二人忽然分開，據知長發亦周圍放風，勁呻自己情路坎坷，結果成功博得兩位母愛洋溢嘅契媽 Christine及性感女星張慧儀前未婚夫、舞王霍紹裘現任女友、亦即「特區之星」馬主李振熊前妻 Sindy Mok（莫秀芳）同情。
帶挈賣麵包
據 Karen身邊好友說：「阿發同 Karen分手之後，成日都同 Christine呻話搵唔到嘢做係 Karen累，好慘好可憐，咁 Christine不嬲都好錫阿發，又真係覺得佢好慘喎，攬晒阿發啲嘢上身，阿發之前同記者講話會去麵包鋪做 marketing，其實都係 Christine安排啦！ 8月開張，女嘅做經理、男嘅做公關，拍住上喎！」不過 Christine得個殼，錢都俾佢前夫 hold晒，而將開張的麵包店老闆為 Christine現任機師男友，阿發每月只支薪 1萬 2千，間鋪仲要 8月先開張。窮到燶嘅長發，聽講連買部 3千蚊手提電腦都要分期，而數口精的契媽亦樂於搵三奶分擔，為長發幫口賣部電腦畀三奶套現，長發有幾燶唔使講。
古井 1號︰擎天 Christine
三奶跟黃長發契媽 Christine份屬老友，據知長發跟 Karen亦是在契媽所搞嘅單身派對認識，三奶同長發拍拖甚至去沙灘浪漫，契媽亦着埋比堅尼（左圖左）跟住，唔夠半年，發仔同契媽關係升級，發仔上週六（ 27日）更陪飛釘契媽（右圖）食飯兼上埋契媽的西九 1,100萬擎天半島香閨。《蘋果日報》圖片
兩古井鬧交
其實黃長發亦深知契媽唔可以長期照顧，所以隨即向另一失婚富婆 Sindy埋手，決心搵個穩陣靠山。好友續說：「 Sindy個前夫係名馬主李振熊，佢係製衣商人好有貨， Sindy之後同舞王（張慧儀前未婚夫霍紹裘）拍拖嗰陣都有射住舞王㗎﹗不過就因為頂唔順舞王多女，所以叫 Christine介紹啲男仔佢識，結果喺一次 party度就識咗阿發，佢成日讚阿發係好純嘅男仔，仲話係 Karen帶壞佢，之後兩個都有約出街，之前 Sindy仲陪阿發去車房放零件撲水，件事俾 Christine知道後，仲同 Sindy鬧咗場大交添！」
本週一（ 29日）早上，契媽 Christine現身中環荷李活道新鋪睇裝修，下午更約了阿發舊愛三奶 Karen食晏，但提到照顧黃長發時， Christine不停迴避鏡頭，又大叫：「你唔好影響到我生活﹗我冇嘢講﹗」，而三奶對於舊愛有契媽同熟女照顧， Karen喺電話中就話：「佢哋不嬲都一齊㗎啦，我同佢冇聯絡，咩都唔知！」
好友着自己舊鞋，仲要火速搵到新熟女照顧，三奶會唔會慶幸自己走得快呢？
古井 2號︰舞王女友 Sindy
左起︰舞王霍紹裘、 Sindy Mok、三奶 Karen、黃長發
三奶 Karen同 Sindy份屬友好，曾經齊齊拍拖玩浸浴，估唔到分手唔夠一個月，阿發會咁快立定新目標。
契媽愛搞 party，於一個單身派對上，長發已全力電死有舞王男友嘅 Sindy（左）。週一（ 29日）本刊透過電話向 Sindy求證照顧長發，佢最初唔認自己係 Sindy，但當記者問及有傳她關照長發時，佢就發晦氣話：「我冇，我真係冇嘢可以答到你！」
三大淘寶井鬥富貴
淘乾井︰ Karen Lee（李姿霆）
原屬伴侶：鞋王鄧劍群（右圖）三奶，育有 1名 5歲女兒，鞋王身家估計逾 8億，未同阿發拍拖前，三奶每月有 8萬任用兼每年有百萬首飾任揀，並與鞋王各持一半市值 1,300萬的匡湖居物業，不過同發仔撻着後，鞋王極速斬纜並追討業權，三奶都乾塘。
