201307241005講母語的多重優越性2013

【講母語ê多重優勢】母語tō是族語,tō是祖語,我ê祖語是台語

 

1.         發音器官ê記持:語言是人ê本能,所以毋管佗一族ê紅嬰仔,直日本會曉講日語,直瑞典會曉講瑞典話。ah-nā自細講祖語,毋但會曉講祖先ê話,koh ē-tàng hōo 家己天生ê發音方式,保存落來;欲學習其他語言ê時陣,tú著有仝款ê音位,發音ê時,tō khah bē有困難。

2.         保存文化,語言是文化ê靈魂,無語言,文化自然消失,親像台語發音ê歌仔戲、南管戲、布袋戲、舞台劇。西拉雅文化失傳,真pháinn叫人kā承認,所以,in ê hiō-tāi tsit-má phah-piànn 欲恢復語言,爭tshí原住民ê身份。

3.         學習第二、第三外語ê基礎---有充足、多元ê用詞,tsiah有法度koh khah有效律來學習其他ê外語,因為有充足ê詞彙ê了解,tsiah有法度真緊了解外語詞彙ê意義,做適當ê轉換。

4.         至少有一種ē-tàng予別族聽無ê話,予家己有使用語言ê選擇權---去上海、北京讀冊ê學生lóng知影,上海人無欲予臺灣人知ê代誌,lóng用上海話講。tō按呢,台灣ê學生mā仝款,無欲予上海ê同學知影ê時,mā用台灣話講。

5.         自救---1)2007年秋天,有一个泰雅族ê少年囡仔hông綁票,綁匪同意伊向kan-nā會曉講泰雅族語ê阿媽討贖金,tō按呢,警察suah真緊tō來救伊矣。  2)2007年,當新光三越直北京hông軟禁ê期間,新光駐在北京ê幹部,隨用台語講話,盡量避免北京ê監聽。

6.         軍事用途---1)1978~79年間,中越戰爭,中國通信兵利用溫州話等無仝ê語言當作「明碼」通信,越南無法度隨聽隨了解。2)台灣原住民ê空軍飛行仔,用原住民語交流,中國飛行仔無法理解。電影「獵風行動」,tō是直講第二次世界大戰美日塞班島之役ê語言運用。tō是講用印地安人ê話,作為通信聯絡用;日軍kàu戰敗猶無了解這種話。所以,語言除了交流ī-tsū-guā,也有buaih交流ê功能。

7.         阻擋bē歡喜ê攪擾---用母語阻擋金融推銷ê電話、來源不明ê電話、欺ê電話等等。

8.         會曉寫一種別人看無ê文字:用台羅表音文字寫、交流,予bē曉、毋bat ê人看無,保持某種程度ê秘密;用台羅拼音ê口座號碼,khah bē佮人仝款。萬不二,漢字nā bē記lih,隨ē-tàng用表音文字代替。

9.         機會增加---1)工作機會:職場直台灣會曉講台語、客語等,當然工作機會會增加。做空姐敢毋是tō是愛會曉台語?去苗栗龍潭推銷產品,敢毋是tō是愛會曉客語?2)交友機會增加:佮朋友ê家長mā ē-tàng交流。醫生、演藝人員…koh khah需要會曉多種ê語言,尤其是家己ê母語。3)提升創作能力---尤其是有關語言ê創作,如廣告、銷售等。

10.      開闊視野---了解家己佮別族ê文化,有sannh-mah無仝、心適ê所在,對咱人ê度量佮包容力有相當ê助益。

11.      國民外交---直國外,佮別國ê人民,ē-tàng分享無仝文化ê心適,做一个有文化、文明,有根ê人。

回應
    沒有新回應!





Powered by Xuite

阿桐伯也留喙鬚,頭毛親像鳥仔岫,

學生畫像留一張,囥坫網頁予汝想!

關鍵字