201204230854陰陽佇聲調的意義

傳統講聲調,有分陰陽,有的人認為是稱采講講一咧爾爾,對我來講是有意義的。

首先,啥是陰?啥是陽?陰是啥?陽koh是啥?

所謂「陰」,是表示「物質的本質」,亦就是宇宙本屬陰性;阿「陽」呢,是表示必須要經過一番的拍拼,才會當完成任務的一項性質。

嘛會使講:陰是靜態的、負責生湠的,所以講:地勢坤,君子以厚德載物。

陽是動態的、是一定愛拍拼的,所以講:天行健,君子以自強不息。

生物界,鱷魚共卵生佇岸邊,疊做一堆,經過一段時間的日曝雨沃,溫度較懸的卵生出公的,溫度較低的,生做母的。有的魚仔,思春期才變做公的,來扑種用的,無,平時攏是母的。

唐格律詩、對聯,對仗原則,平對仄、仄對平;實詞對實詞,虛詞對虛詞,嘛是相對的。男對女嘛是相對的,同性戀來講,嘛是相對的。有以上對陰陽的相對概念,來講聲調就真簡單理解!

陰佮陽是相對的名詞,對台語八个聲調來講,除了陰陽不分的上聲以外(鹿港腔的陽上嘛比陰上較有變化),陰平一長音無變化,用數字表示是55;陽平需要變化才會當完成,用數字來表示是13;陰去發音比陽去輕鬆,陰去是低降,用數字表示是21,陽去愛共聲調調懸33,調懸是需要氣力的;(-p,-t,-k,-h)陰入發音比陽入較輕鬆,用數字表示是31(中短調,斷音);(-p,-t,-k,-h)陽入嘛愛共聲調調懸才會當完成,用數字來表示是55(高短調斷音)。

陰陽聲調的意義就是佇遮按呢!陰平佮陽平相對、陰去佮陽去相對,陰入閣陽入相對。「陰」佮「陽」的發音,已經講出相對的概念!

回應
    沒有新回應!





Powered by Xuite

阿桐伯也留喙鬚,頭毛親像鳥仔岫,

學生畫像留一張,囥坫網頁予汝想!

關鍵字