201204081241踅夜市

                   踅夜市[sh11ia11tshi33]                       -改寫自學生作品2012-04-04-

 

夜市是我上愛的所在,佇夜市內底會當看著真濟心適的物件,佇夜市內底每一个人攏是歡頭喜面,喙笑目笑佇踅夜市。踅夜市的時陣,會聽著真濟生理人的喝聲、囡仔的笑聲、人客的點菜聲;tsia的聲,予夜市加添足濟足濟鬧熱的氣氛,若無,毋是夜市啊。夜市內底有真濟好食物,臭豆腐、煙腸、tsìnn香菇、牛排、章魚燒、米粉炒、蚵仔煎、豬跤滷,kan-nā想著喙瀾水強欲流--落來。猶有足濟好食的物件,會當佇夜市內底揣著。

夜市毋但會當予人食甲飽inn-inn,閣會當聽著各種無仝款的聲音,看著各種人無仝款的穿插[1]猶有,嘛有真濟𨑨迌的設備通耍,像圈禮品、夾布尪仔、耍投籃球、擗珠仔,做講提著獎品,嘛予逐家的心情真歡喜。人講「生理囝歹生」,毋過,我感覺每一擔的生理人攏足𠢕--ê,逐家攏誠扑拼紹介家己的產品,講甲「比手畫刀」,「喙瀾全波」,」予人客逐擔想欲食!

我若去夜市仔,逐擺會去食章魚燒,因為章魚燒若咬落去,有一種香香、鮮鮮的章魚味,外面包的是麵粉佮脆脆香香的柴魚,頂面閣有美乃滋,實在是人間的珍味,若閣哇沙米濫--落去,甜甜、薟薟[2]哇,好食的口感,是十全十美的小食,喙內滿滿、軟Q軟Q的滿足感,幸福的感覺敢毋是是按呢咧?親像走馬燈仝款,值無仝款的季節,賣的物件嘛無啥仝款,予人客看甲目睭花~花花,揀甲心花開~開開。揀衫仔褲,佮意是汝的,無佮意揀甲佮意。自由自在的氣氛,敢毋是是夜市仔的精神咧?

上予人感心的,是親切的相借問,是溫暖的人情味,是人kheh人,kheh燒的充實感。食濟食少無要緊,逐家攏食會起,原來,平等嘛是一種自然輕鬆的享受,莫怪逐家攏足愛來。踅夜市實在是一个足好的活動,人生的體驗若無夜市,趣味會減一半,啊,有夜市通踅的台灣人,福氣啦。

 

 



[1] 穿插[tshīng33tshah31](穿著)

[2] 薟薟[hiam33hiam55](辛辣)

回應
    沒有新回應!





Powered by Xuite

阿桐伯也留喙鬚,頭毛親像鳥仔岫,

學生畫像留一張,囥坫網頁予汝想!

關鍵字