醫學台語筆記：第六禮拜進度               Lah-jih 2006-04-04

「老師驚改作業，學生驚考試。」講著期中考tih-beh到，學生tio̍h開始緊張計較，希望老師手下留情，建議啥物thang考，啥物m̄-thang考，總講一句tō-是mài考siuⁿ深，hō͘-in ē-tàng kôan分通過。

為tio̍h beh hō͘學生ē-tàng吸收較濟醫學台語，ē-tàng解讀醫學台語ê文字資料，所以tī期中考晉前加強羅馬字教學，期中考ê範圍當然tō khǹg-tī台語聲韻羅馬字ê測驗。講tio̍h考試重點khǹg-tī羅馬字，學生tō提出意見，雖然in chiâⁿ肯定老師ê認真kap用心，in講in無反對用羅馬拼音來教醫學台文，m̄-kú in無希望用羅馬字來出考試題，in-ê理由是：

1、          教醫學台文ê目的是beh教醫學生會曉用台語kap患者溝通，提高醫療品質，m̄是beh教醫學生會曉寫台語文。

2、          醫學生主修是醫學，m̄是台灣語文，學會曉羅馬字，對醫療kap患者溝通並無影響，實在無必要考羅馬字。

3、          羅馬拼音kap英語發音有衝突，學校已經要求醫學生tio̍h加強英文能力，所以m̄-thang koh要求學羅馬字，增減負擔。

4、          學生ê台語能力差別真大，若考羅馬字，對台語講bē lián-tńg ê學生，siuⁿ過刻虧，有ê學生根本tō bē曉講台語。

學生ê意見真濟，是真正常ê回應，老師ē-tàng了解，mā值得參考，總是in對羅馬字ê教學目的無啥了解，有需要kap in交換意見溝通一下，經過醫學系ê安排，chiâⁿ十個學生kap老師做夥交換意見。想講醫學系教授對羅馬字教學有可能無啥了解，除了說服學生以外，mā有需要hō͘教授了解羅馬字教學ê重要，所以tō準備「醫學台文」羅馬字教材kap「內外科看護學」chit 2本冊hō͘教授參考。而且提出醫學台語教學ê設計理念：

1、           短短一學期，若kan-nā用口頭直接傳授一kóa醫學術語、醫生患者ê對話，學生得著ê效果實在有限。

2、          若限用漢字出題來考試，對羅馬字ê學習一定是真大ê阻礙。

3、          羅馬字ê學習非常重要，會曉羅馬字tō有法度解讀用羅馬字書寫ê醫學資料、文獻、教科書。

4、          老師是beh提供學生一支釣篙，hō͘學生會曉家己釣魚，羅馬字tō-是chit支釣篙，「醫學台文」羅馬字教材kap「內外科看護學」tō-是大尾魚，特別chit本用羅馬字編寫ê「內外科看護學」，實在真值得醫生應用一世人ê寶貴資料。

5、          羅馬字tō是拉丁字，雖然kap英語有淡薄仔衝突，伊ê發音卻是khah óa近歐洲國家，ē-tàng kap國際接軌，對將來出國深造一定真有幫贊。

經過互相溝通對談，總是hō͘教授kap學生了解羅馬字教學ê必要，接受chit款教學理念，同意繼續chit款模式教學kap考試方式，不過學生煩惱--ê是驚做考bē過關，成績siuⁿ-bái，影響以後分發實習病院ê意願，所以我mā同意in-ê要求，提供出題範圍，kā試題出khah簡單--ê，對聲調khah困難學--ê tō盡量mài考。

有溝通，有圓滿ê結果，續落去ê上課tō會得順利進行，chiah-ê學生真可愛，會曉家己phah拚，學生若beh讀，老師教起來一定輕鬆，期待學生有好成績ê表現。