2017清明培墓 @ 潘科元台語文理想國 :: 隨意窩 Xuite日誌
  • 頭戴台灣天
    跤踏台灣地
    喙講台灣話
    手寫台語文

  • 關鍵字
    1. 沒有新回應!





  • Powered by Xuite
    2017040717292017清明培墓

    (原本發表佇 Facebook 2017-04-04)

    今仔日清明,阮家族相招去培墓[puē-bōng]。早年阮是培正月初二,最近幾年,閣加上清明。若是三日節(舊曆三月初三),阮自來毋捌當做家族个培墓日。

    有資料講漳州儂是培清明,泉州儂是培三日節,客儂是培過年後,按呢阮培正月初二,是算啥乜儂咧?阮屏東萬丹个墓仔埔,正月初二真濟儂來培墓,南部閣有真濟所在也攏是按呢,但是嘛是有儂培清明。

    阮二九暝迄工下晡著愛轉去舊厝大廳辭年[sî-nî]、祭祖,正月初二閣愛去埔--裡培墓,也叫做「探墓厝」。過年時仔,就是阮祭拜祖先重要个期間。

    當然有儂講:新風水,頭三年清明去整理、拜牲禮才叫做「培墓」。阮是無按呢限制「培墓」个用法,風俗各地無仝,逐家互相尊重就好。

    今仔日佇埔--裡,有聽著鄉親講一句真心適个話:

    新豬哥,老豬母,豬仔囝滿跤趖。(Sin ti-ko, lāu ti-bó, ti-á-kiánn muá-kha sô.)

    注意即句話个「母」字是唸 bó,毋是唸 bú,按呢才有押韻。我本來是想講 bó 是漳腔,bú 是泉腔,但是這嘛真僫講。


     

    即篇佇面冊貼出來了後,得著一寡先進个印證:台南以南,有真濟所在攏是正月初二培墓。

    有朋友問講「新豬哥,老豬母[bó],豬仔囝滿跤趖」即句話是啥意思,我想想咧,按呢回答:

    就是田庄生活一个真鬧熱个畫面。但是嘛有可能是咧比喻死翁个婦人儂,閣招一个新翁入來,了後閣生真濟囝,這佇平埔母系社會个時代,特別有可能發生。

    也真感謝「藏書界竹野內豐」 黄震南先生報我注意著迄句話佮《千金譜》个文句有重疊:

    「家內飼豬著豬槽,泔著多,䊩著濁,新豬母,老豬哥,豬胚照路行,豬囝濫糝趖。」

    但是千金譜迄幾句話,全然[tsn̂g-jiân]就是咧描寫農村飼豬个情形,無比喻个涵意。

    台語輕重音節佮喉入聲變調个關係...|日誌首頁|台語「風騷 hong-so」佮...上一篇台語輕重音節佮喉入聲變調个關係下一篇台語「風騷 hong-so」佮華語意思無仝啦!
    回應