總鋪到街市 @ 潘科元台語文理想國 :: 隨意窩 Xuite日誌
  • 頭戴台灣天
    跤踏台灣地
    喙講台灣話
    手寫台語文

  • 關鍵字
    1. 沒有新回應!





  • Powered by Xuite
    201611211515總鋪到街市

    去參加一个營隊,睏總鋪,我穿一領長睏褲,早時起來,外褲挔[hiannh]咧,欲出去外口个便所換(因為無分男女,攏蹛仝即間兩排个總鋪厝仔)。

    外口是露營區,有種真濟樹仔,我行來行去,雄雄看著幾棟大樓,是大學校園抑是研究院區个形。

    我猶原閣穿睏褲,感覺真歹勢,緊走入去一間大樓,想欲去一樓个便所換,但是守衛不准,共我趕出來。

    連鞭我出來到鬧熱个街路,五花十色,親像是中囯繁華个大都市,我講華語問一个過路儂:〔請問這是什麼地方?〕伊開喙應,我聽袂清楚,閣問一下真,伊煞笑笑,越頭做伊走。

    「這到底是佗位?我欲按怎離開即个所在?」我真緊張,問家己。

    「哦喔!我知矣!」

    我目睭瞌咧,開始唸南無阿彌陀佛,第一句閣唸袂好勢,唸到第二句,親像電影咧變換場景,phia̍k 一下,所有个景緻攏消失去,目睭前規个變暗,我精神過來矣,只是目睭猶原瞌瞌,哪咧回想拄才个夢境。

    雖然我已經醒過來,但是我猶原是佇夢中,一个閣較大个幻夢中,拄才个夢,簡單唸兩句佛號就會使脫離,但是我即陣所佇咧即个深沈个夢,就毋是凊彩仔唸兩句仔佛號就有才調脫離个,著愛念佛念到一心不亂才有可能。

    所謂輪迴,也是一个過一个夢境連環相紲[sio-suà]。重重疊疊个夢,親像永遠脫離袂了,若最後正實脫離了了,大概就叫做涅槃[liap-phuân]。

    反對教育部台語字用「的」表「ê...|日誌首頁|台語「粗牙」是多音、多義詞...上一篇反對教育部台語字用「的」表「ê」下一篇台語「粗牙」是多音、多義詞
    回應