因果報應，毋是啥儂、啥靈塊刑罰[hîng-hua̍t]--我，攏是家治做得來个。著親像tēnn拳頭母出力掙石獅，指頭仔目會痛死，這咁是石獅塊審判--我、處罰[tshú-hua̍t]--我？

東方儂个人生觀，著是按呢。毋是因為上帝叫我勿做，若無伊會大受氣、處罰我，所以我毋做；亦毋是因為上帝叫我著做，做了伊著會賜福予我，所以我才做。不過是家治面對家治个一切去承受一切个後果niā-niā。

但是，按呢顛倒足著磨[tio̍h-buâ]。儂講船破海tshē底，設立一个像大海个上帝予咱通倚賴[uá-luā]，咁毋是加真快活咧？

佛、菩薩扑算毋是啥乜靈體佇半空中飛來飛去，彼卡成是精神修持个典範[tián-huān]，雖然我閣毋知影精神个本質是啥。總是，呼請[hoo- tshiánn]典範者佛菩薩个加被[ka-pī]，會凍加強我即个不時塊tio̍h-tak，nńg-tsiánn甲無法度照家治个意志去行个心。

這是無法度聽趁[thiann-thàn]基督教義，但是閣無才調行孔子路个我，另外一款个抽退步。有智慧个儂講：退步原來是向前[thè-pōo guân-lâi sī hiòng tsiân]，無的確我日後會凍體會即點。

雖然我毋知影按怎安立家治，總是，時刻做眼前[gán-tsiân]該做个代誌著是。想欲逃閃，著拜請佛菩薩个kīng-tsōo，按呢，我嘛是kīng-tsōo佛菩薩，做伙來予即个世界卡好。

著愛催逼家治，用心將各種典範者个遺作[uî-tsok]一盡[it-tsīn]讀完，卡袂欲死閣毋願瞌目[kheh-ba̍k]，一世儂烏有去。