踏話頭三項：
第一、以下所唸个，是「一種」漳泉濫的唸法。
第二、翻譯佮解說各樣[koh-iūnn]。
第三、台語並非全然是一種日常生活个口頭話。

韓愈[jú/ní]〈祭十二郎文〉摘錄[tiah-lio̍k]：

「吾年未四十，而視茫茫，而髮蒼蒼，而齒牙動搖。念諸父與諸兄，皆康彊而早世，如吾之衰者，其能久存乎？吾不可去，汝[jú/ní]不肯來，恐旦暮死，而汝抱無涯之戚也。」

我年歲未上卌[buē tsiūnn-siap]，抑[iah]目睭著霧sà-sà，抑頭毛著白昲昲[phú-phú]，抑喙齒著li̍h-lo̍k搖。想著遮个叔伯佮叔伯兄，攏真勇健煞早早過身，像我遮衰荏[sue-lám]个，咁會凍食外久？我袂凍去，汝毋肯來，恐驚緊縒慢[kín-tsua̍h-bān]著死，予汝懷抱無涯个傷悲啊。

袁枚[muî]〈祭妹文〉摘錄：

「嗚呼！生前既不可想，身後又不可知。哭汝既不聞汝言，奠汝又不見汝食。紙灰飛揚，朔風野大。阿兄歸矣，猶屢屢回頭望汝也。嗚呼哀哉！嗚呼哀哉！」

唉呀，在生亦袂凍按算，過身亦無凍知影。哭[khàu]汝亦無聽見汝應聲，拜汝亦無看見汝來食。銀紙颺颺飛[iānn-iānn-pue]，北風sǹg-sǹg吼，阿兄欲來轉矣，iáu tiu-tiu 越頭看汝neh。唉呀，哀傷啊！唉呀，哀傷啊！