這個月底，阮系大三生，愛交出畢業作品个申請計畫。有一个學生寫兩个案予我看，看是卜做台語教材、教具，抑是做陣頭變遷个研究。伊寫个內容，看著有卡hàm大，亦無啥所見奇[sóo-kiàn-kî]。我著按呢共伊回批，予伊一寡想法做參考：

○○：

這兩種主題攏袂bái。毋閣，因為已經攏有真濟便个書面資料通參考矣，咱若卜做，一定愛做出家治个特色，毋通只是塊抾(khioh)儂个話尾，按呢變做是資料收集、讀冊報告，無算是畢業專題。若準只是應付付咧交出來，過關，日後看著，家治嘛會感覺遺憾。

毋免想卜做甲外大、外完整，主要愛有家治个創意，掠要點去發揮，佇過程中得著成就感，做出一份感動家治，亦感動別儂个作品。

有困難，毋通家治一儂受苦。愛趕緊講出來予朋友佮老師聽，逐家參詳討論，比較卡會有靈感。另外一方面，家治平常佇生活中，著愛多方面去觀察、觸發，不時想講，按怎將一般儂袂去聯想著个物件，共怹關聯起來。可比講，環保運動佮台語文化會凍用啥乜款卡趣味、奇巧个方式結合做伙，而且設計出一寡教材。

就畢業作品來講，無要求講汝著愛做出歸套个完整教材，亦無影講因為對家治个台語程度無夠信心，而且初級教材卡好揣(tshuē)，所以汝著想卜做低年級个教材，íng-íng初級教材卜做出特色佮價值，顛倒卡有挑戰性。

可比講，咱个作品，是卜提出一个企劃案(khì-i̍k-àn)，想出會凍將環保理念佮運動，融合入去台語文化教材內底个可能性，來設計出各種教學單元佮活動。然後做出一寡實例。對象是高年級小學生。

以這種構想做基礎，巧妙來運用一切台語文化个元素，親像汝寫講有囡仔歌、囡仔古、孽詰仔話(gia̍t-khiat-á-uē)、俗諺語，但是除了這以外，閣有雖然真平常但是深想起來，蓋有意思个日常口語，親像台語講「討債(thó-tsè)」，佮華語「討債」意思咁有共款？（華語講个「討債」，台語愛按怎講？）這種物件，著是台語文化个特色。

將這種特色結合環保，可比講，咱有一个教學活動，是設計環保袋，頂峘愛寫一寡漢、羅對照个台語文口號，親像「保惜大自然，毋通討債哦 ^^ Pó-sioh tāi-tsū-jiân, m̄-thang thó-tsè őo ^^」，利用這，閣共囡仔介紹台語个「討債」背後曲折(khiok-tsiat)个文化意義。過去个儂，生著敗家(pāi-ke)个浪蕩囝，家伙開了了，父母真怨嘆，講這个囝是來討債个（「父母相欠債」，背後有佛教思想通俗化个過程）。以環保理念來看，工業時代以後个現代儂，著是大自然个討債囝，將大自然个家伙開失(khai-sit)了了。但是父母無虧欠咱，是咱虧欠父母；大自然無虧欠人類，是人類虧欠大自然。

定定按呢思考，來予台語得著新時代个性命力。

另外，親像汝另外一篇「陣頭」个計畫，提起講：
「預計在本作品中將針對台灣早期的廟會陣頭及現今台灣各地發展中的陣頭作資料的蒐集及介紹，並將廟會陣頭的興衰及變遷做統整。預計全文將以台語撰寫介紹其特殊名詞解釋。」

感覺嘛是傷過 hàm大，袂輸塊寫博士論文咧。汝需要閣卡具體、明確，佇小範圍內表現特色佮創意个計畫。調查、研究出別儂毋捌講過个發現、分析佮見解。

可比講，咱來做陣頭个語言文化。針對某幾種卡相關个陣頭，完整收集相關个語言。伊个服裝、道具、動作、陣勢、禁忌、僻話(phiah-uē，普通个物件，但是只有家治儂才聽有个講法）、俗語、表演語言（話、咒、歌），一切相關个台語攏共記錄落來，閣進一步去分析，研究伊个來源佮內涵。親像伊个唱唸按怎配合陣頭个表演動作，kiann5-tang7佮停落來定點个時，唱唸咁有啥乜變化，背後有啥乜道理。

一方面愛用心扑拚。一方面嘛愛考慮著一寡現實，保護家治。做這種田野調查，少年查某囡仔難免會遇著一寡額外个阻礙。這扑算汝亦有經驗。我佇遮特別閣提起，是卜講，我做一个老師，會顧慮著這種問題，希望一切會凍圓滿。

陣頭我是外行。若準汝決定卜做陣頭，想卜揣別个老師指導，嘛無問題。總是，做出來个成果，愛分享予阮，予我加(ke)一个機會學習成長哦 ^^

潘老師