下昏暗去看影戲《人之島》，導演王金貴，對緬甸[Biān-tiān]來个，敢是華僑个款。故事是塊講一个青年轉去蘭嶼[Lân-sū]故鄉走揣純淨自然个聲音，後來嘛揣著伊个真愛。

蘭嶼在地儂將in个所在叫做Pongso no Tao（p, t 攏是無送氣个清音），意思是儂个島嶼，Tao著是「儂」，亦著是「雅美」族正名改做【達悟】个呼音。台灣原住民个族名攏是in對「儂」个講法。

 即齣佮頂日仔我租來看个《心靈之歌》蓋儕共同點：原住民、聲音、三角戀愛、閣有一个牽tshuā男主角个良師益友。平平屬佇劇情片[kio̍k-tsîng-phìnn]，《心靈之歌》記錄卡儕原住民个音樂，故事卡強烈--小可仔。抑《人之島》，導演講，伊是卜扑一phō輕鬆小品。男主角緣投俊騰，女主角白裼[pe̍h-theh]秀麗。海天樹草，自然个景致真tsiânn lè-táu。平和溫暖个劇情予儂幽幽仔感心。當做時間外个娛樂來看个儂，加減看著一寡Tao儂个生活文化，有影是一兼二顧。

毋閣全台灣干那六間戲園有塊做，第二工niâ，台中萬代福門口儂袂少，看別齣个卡儕，佮我看這齣共場个才六、七个。台灣儂袂曉通支持台灣个好物，毋知卜按怎？