2016121922262016年12月19日

還有兩個星期就係2017年,雖然話今個月還有七個工作日,但都希望可以順利渡過到下年......

開工方面,上星期的四個工作日都總算係過得順利,即使在上星期一當日唔可以在Lunch Time之前做晒所有工作,但都可以在之後一小段時間解決問題,總之這幾日完全無留低在倉務部就已經係「天意最好的安排」......上星期一晚傻豹突然打電話畀我,問我下個月可唔可以同四仔傑換跟車,要我去跟佢,我就當然唔會睬佢啦!老實講,每次跟車上的安排,都係由四仔傑主動要同我們去換,到我們有需要換時,佢就唔會理睬我們,好似今年農曆新年假期前的一個星期一,當日我想話留低在倉務部,打算在下晝上去十四樓睇醫生,剛剛好佢就係要留低,所以咪問佢可唔可以換一換,但佢就係唔肯,只係一日咁多,兼且都係出去做一兩個戶口之後就執一執卡板,未到Lunch Time之前都可以做完的單,但佢點都係唔肯,既然係咁我就已經決定以後唔會再同佢有「交易」,再加上早前有傳聞話如果我因為跟的那位車長要在放工後返新港寫字樓收文件,而我想搵其他車在做晒當日工作後返入去屯門的話,佢就叫某幾位車長唔好理我,咁樣我就更加唔會應承佢啦!其實我們好多人到今日都唔明白,傻豹點解還要幫這位已經越來越唔值得幫的人,即使曾經認佢做「契爺」也好,但講到「貢獻」就真係講唔出有幾多,反而犯錯就久唔久來一次,就算在倉務部裡面都唔係一個受歡迎的人,當然在我們運輸部大部份人的立場來講,如果要再抽一個人調入去倉務部,佢都係第一個人選,當然對倉務部來講就一定唔會係第一......或者係已經有人想千方百計將我調返入去,最近又收到消息,話FG部已經同街車「骯冥」簽約,睇來我除了要好似上次Blog所講要搵定一條「後路」之外,還要做多幾手「準備」,總之我要搞到班「豆泥」管理層要最終放棄之餘,亦都要承受更加多的「惡果」......

上星期五又再請了一日假,就趁有時間用部手機駁上一支「唱K神器」去練習「唱K」,練了大約三個鐘頭後就休息一下......前日本來又係想趁細佬下晝出街之後再練習多一陣,點知媽咪又突然同佢一位同事調假,即係話我又要同佢一齊在屋企裡,無得練習,唉!唯有走返入房開著部CD機去聽,最重要係唔想忘記歌詞。到了夜晚六點,經過一輪沖洗之後,就出了屋企門口,起程出去屯門市中心,但第一個要去的地方唔係公司的聯歡會,而係去商務書局,因為我還想買一本由龐一鳴推薦的書──《活著回來》,可以在開席前少少時間用來解悶,之後去到聯歡會現場,我自己的那一圍最初得三個人(包括我同肥茵、那位一直「留意」的人),後來在五分鐘後其他人才陸續出現......到七點正式開席後,又係要我們先聽東瀛「廠頭」的一輪致辭,跟住就係「工夫改善獎」的頒獎,本來之後就應該到「啤酒競飲大賽」,但又無端端話未準備好,結果又將個「卡拉OK比賽」提前開始,而我又要被這個突然的安排打亂了陣腳......比賽過後,才開始「啤酒競飲大賽」,跟住就係三個比賽(麻雀王、卡拉OK同啤酒競飲)的頒獎,最後就係大抽獎環節,今次雖然我又抽唔到,但FG部都有起碼十個以上的同事抽到,而我同阿彬今次比賽都衰衰地得到安慰獎,其實都係志在參與同食一餐飯,下年真係唔知會唔會再有機會,但一定唔會再參加「卡拉OK比賽」,除非好似三年前咁樣唔夠人去玩,可以在途中「插班」啦!不過我今次都總共飲了三杯紅酒,差唔多等於一樽的份量,已經嚇到幾位阿姐差D要「禁制」住我唔畀我繼續飲,哈哈哈哈......

之後到散席返到屋企之後,雖然成夜都唔係睡得太好,但都無影響昨日下晝返TKD班,本來阿勝在前晚透過Whatapps話有病返唔到來On Duty,但到最後都係可以返來......不過今次都係做那些在之前一堂的「無厘頭」練習,兼交又要面對住那位理論多多又唔專心的小朋友,始終都係未有辦法好好咁去「處理」一下佢,都係要留待Miss趙返來解決這個問題......

今日我又事先請了假,係今年最後一日B假,下年四月中前如果要請假就會用A假,之後就係用B假一直到年尾,但下年會唔會好似今年咁樣成年在「Y記」渡過呢?今日下晝終於都將我那一對負重綁腳帶「加料」,起碼要等多幾日才肯定今次「加料」的成效......而家諗番起前晚強仔問起我有無「蜜運」,問我做咩唔快D去搵,對我來講這方面點都要有好多事都要做足功課,搞清楚一切先可以開始,雖然而家可以話多了好多機會出去公司以外的地方面對其他人,但就始終還未遇得到肯定可以開始的,下年睇怕這方面都應該唔會有什麼進展啦!

回應
關鍵字
    沒有新回應!





Powered by Xuite